الرئيسية / البرامج / حواء على الهواء: كيف تتصرفي إذا أحرجك زوجك أمام الناس؟

حواء على الهواء: كيف تتصرفي إذا أحرجك زوجك أمام الناس؟

مقدمة البرنامج: سماح مناصرة.

تاريخ الفقرة: 23 يناير 2017.

الضيفة: الأخصائية النفسية والاجتماعية، منور شبانه.

 

المقدمة:

على أثير راديو علم متواصلين معكم مستمعينا، وبرنامج حواء على الهواء، هلّأ بتنقسم السيدات في ردات فعلهم في حال إنهم أُحرِجوا أمام جمع كبير من الناس، وكان هذا الإحراج موجه من قبل الزوج، بعض السيدات إلي بتتعامل مع الموقف يعني ما بتوضح غضبها أمام الناس، ولما يحرجها زوجها بتتعامل بشكل عادي وبكل هدوء وبتدارك هذا الموقف، في بعض السيدات بيحرجها بتحرجه أي تصرف أي انتقاد ممكن يوجهلها ياه بترد عليه الطاق بطاقين، في بعض سيدات لما زوجها بوجه إلها انتقاد، وممكن الناس إنهم يضحكوا فهي كمان بتضحك معهم فهون بتكون خرجت من هذا الموقف بسلام، شو الأسلم لحواء لحتى تتعامل بالطريقة الصحيحة في حال تم إحراجها من قبل زوجها أمام الناس، ليش أدم بحرج حواء شو الغاية شو الهدف، راح نحكي بهذا الموضوع أكثر مع الأخصائية الاجتماعية والمرشدة النفسية الأستاذ منور شبانه، أهلاً وسهلاً فيكِ أستاذه منور صباح الخير.

أ. منور: يسعد صباحكم جميعا أهلاً وسهلاً بالجميع.

سماح: أهلاً وسهلاً بحضرتك، الأصل في العلاقات الزوجية أن يكون الاحترام فيها سيد الموقف، لكن في بعض الأحيان إما بقصد أو حتى بدون قصد بنلاقي إنه في بعض الرجال ينتقدوا زوجاتهم للأسف هذا الانتقاد بكون قدام الناس، ليش شو إلي ببرر لأدم إذا عمل هذا التصرف؟

أ. منور: صحيح في البداية يعني الكل بيعرف إنه العلاقة الزوجية تبنى على التفاهم، والمشاركة تبادل الثقة، والمحبة، لكن يكون في شوي مشكلات، والمواقف إلي بمر فيها الزوجين هلّأ بالنسبة للمواقف الإحراجية أو مواقف النقد تحديداً أمام الناس أو أهله بتكون هي فعلاً صعبة ومحرجة، ويجب أن تخرج منها المرأة أو الزوجة بشكل سريع وغير ملفت، هلّأ، هذا بيرجع لثلاث محاور أساسية؛ إلّي هيّ: الزوج، شخصية الزوج لإنه هيّ أدرى بشخصيته، كيف تعاملاته، كيف يمكن يبدر منه كمان الموقف الأحراجي، الموقف نفسه شو الموضوع هل هو مقصود، أو غير مقصود؟ هل هو لأول مره أو هو متأصل فيه أو نوع من السلوكيات الموجودة في زوجها بشكل مستمر.

لازم تتفهم الزوجة كمان المحور الثالث إليّ هيّ الزوجة، نفسها شخصيتها ردود أفعالها هذه الأشياء، ممكن تحكم كيف نخرج من هذا النقد أو من هذا الموقف المحرج، سواء أمام الناس أو أمام أهله، هلّأ إزا كان مقصود الزوجة تعرف إنه هذا مقصود هي عادة فيه حتى لما يكونوا متواجدين لحالهم الزوج، والزوجة عمره ما إنتقدها عمره ما قدم إلها شيء يحرجها، لكن بتعمد أو بتقصد أمام الناس أو أمام أهله إنه يحرجها، هون بتكون الزوجة جربت عدة أساليب لردود أفعالها، تجاه الزوج أو اتجاه هذا الموقف، طبعاً، بزبط مع الاستمرارية ربت عندها أو نمت حس ردة الفعل.

سماح: يعني، في بعض الأزواج بكونوا يعني مثلاً بقصد إنهم مثلاً يغيروا الجو إنهم ينتقدوا زوجاتهم، بشوفة الآخرين بضحكوا، فبدو يلطف الجو بكون خرب الجو بزيادة هون ممكن إنه يعني تدارك هذا الموقف شو الطريقة السليمة، والصحيحة لتدارك هذا الموقف إنه مش قصدوا يحرجها بس قصدوا إنه يغير الجو؟

أ. منور: صح عشان هيك بتكون هي متفهمة شو بزبط هو بقصد من هذا المعنى، عشان هيك هي لازم تخرج من هذا الموقف بأسرع ما يمكن، أول شيء ما تلفت النظر أمام الحضور إنه هي إنحرجت، يعني لغة الجسد تبعتها لردة الفعل المفروض ما تعطي إنها استاءت، إنها توترت ملامح وجهها اختلفت، لا اتبين الإشي كانوا عادي تكون مهيئة نفسها مع إنه إحنا بنعرف المواقف المحرجة، ومواقف النقد دائماً بتيجي بشكل مفاجئ، وحتى الإنسان بكونش محضر لردة فعله، لكن هي بدها تبين هون إنها هي وكأنها كانت تنتظر أو على علم بهذا الشي، فممكن بإبتسامة لطيفة مع الزوج، ومع الحضور أو بكلمة سلسة ذكية تكون إنه أنا بعرف أنت قديش بتحب تمزح دايماً بزبط بصير إشي تاني العصبية بتقوم لا بالعكس.

أنا بحب أقول النقطة هاي إنه؛ فيهم في ما بينهم لما يرجعوا للبيت أو يختلوا بنفسهم، المفروض هي لما بدها حتى تعيد هذا الموقف هو بفقد سلوكه، لإنه هون بتوتر العلاقات أكثر لازم تفهم الزوج. إنه أي إشي أنت بتقدر تقوم فيه أنا بقدر أقوم فيه، لكن أنا بحترمك أنا بحبك أنا ماخده اسمك كمان ما بصير أنا أحرجك قدام الناس أو أستهزء فيك قدام الناس أو حتى أنقدك، لإنه أنا يعني برفع نفسي فيك، أنا بفتخر فيك، هذه الكلمات الإيجابية كتير بتأثر فيه، هلّأ إحنا بنعرف إنه السلوك متعلم أمام الناس، وأمام أهله تذكر الإيجابيات الموجودة فيه، يعني على عكس تصرفه، هو بذكر سلبياتها أو ممكن ينتقدها، أو ممكن يحرجها، لكن هي لو حتى أحرجها عدة مرات هي تتعمد إنها تذكر دائماً ايجابياته، الأشياء الحلوة فيه يعني لإنه هي بدها تعلمه المواقف بطريقة غير مباشرة، هون براجع نفسه، بحاسب نفسه، مبدئياً إحنا حكينا إزا في حال هي بدها تواجهه في ما بعد يحكو في الموقف.

سماح: تمام هون كمان في بعض السيدات إلي بتشكي إنه زوجها بنتقدها أمام الآخرين بأشياء مش موجودة، هي بتتفاجئ من وين جاب هاي الصفة إلي أطلقها عليها أمام الناس، وليش عمل هيك بهذا الموقف كيف تخرج حالها، تحكيلو من وين جايب هذا الكلام ليش أطلقت عليّ هذه الصفة، ولا كيف بدها تدارك هذا الموقف بأقل قدر من الإحراج؟

أ. منور: نهائي نهائي ما تجادله في هذا الموضوع حتى لو شيء مش موجود فيها بالعكس تصرف النظر عن هذا الموضوع زي ما حكينا ممكن بابتسامة، وكإنه نكته أو مزحة بعملها، يعني بتوصل رسالة للحضور إنه هو بمزح أو هو بضحك، وزي ما حكينا ممكن تغير الموضوع أو ممكن تقول يعني قديش أنا بعرف إنك انت أديش بتحب المزح، والضحك وكذا كذا وتغير نهائي تنتقل رأساً وتنتقل إلى موضوع تاني وتستغل هذا الموقف بالعكس لصالحها إنه أنا كذا كذا لأني بحبك يعني لأني أنا بعرف أديش أنت بتحب الكذا كذا، هي بتبين إنه هي إيجابية معو بتكون ردة فعلها لازم تبين إنه هي إيجابية تحكيله مثلاً أنا بثق فيك أنا بحبك، ولا مرة توجه إله النقد أمام الناس.

سماح: تمام لإنه هاي نصيحة مهمة جداً للسيدات إلي كل كلمة بحكيها الزوج بترد عليه عليها بنتقدها بتنتقده بحرجها بظلها دور على موقف لحتى تحرجه حتى وإن كان عزيز عليها، وغالي لكن سببلها هذا الأمر هي بدها تسببوا؟

أ. منور: جداً هذا كتير خطير كمان الموضوع لإنه بدهم يضلوا في دائرة من المشكلات وفي دائرة من العتاب، والنقد بدها تضخم الأمور عشان هيك إحنا بنحكيلها ما تضخمي الأمور بالعكس في كتير من هذا النقد لصالحك، ولتصحيح العلاقة ما بين الزوج كتير مهم، هلّأ هون إنها مش تظل تنتظر تقول هلّأ لما نكون مع أهله أو مع الناس يمكن ينتقدني بدل ما تعيشي هذا التوتر، وهذا القلق إعرفي شو الأسباب إلي بتخليه زوجك يعمل هيك، بزبط افهمي ليش هو مضايق منك، كل إشي سلبي في وراه سبب، هذه المواقف الإستفزازية والمحرجة إفهمي سببها، ممكن في جلسة الانفتاح على بعض أنت شو إلي بتريد تحكيه قدام الناس أو أهلك.

سماح: تمام وهون كمان يعني ممكن إذا أداركت هذا الموقف ما تكون عرضة يعني حدوث هذا الموقف، أو ما تتعرض لهذا الموقف كمان مرة حتى لو تعرضت إله كمان يكون في عندها ردة فعل ايجابية حوله؟

أ. منور: صحيح ما تفتحش المجال لغير من الناس أن يدخلوا، لإنه بتعرفي في ناس بس بدهم شغله بسيطة ما بين الزوج والزوجة ليدخلوا في ما بينهم، بالعكس إنتي بيني العلاقة على أحسن ما يمكن، إحنا بنحب نمزح بنحب نغير جو، وإنه هذا نوع من تغيير الجو، لكن في ما بينك إنتي وزوجك بتقدري إنتي بكل لطافة وكل هدوء تحكي معه، إنه أنا بضايق أنا كذا كذا شو الأسباب إلي بتستدي هيك عشان أجنبها شو بتحب، يكون كتير حلو التفاهم أما ما تعملي الند بالند، والسلوك بالسلوك يعني العدوانية بالعدوانية.

سماح: صح خليكِ أذكى من هيك، وخليكِ كمان يعني أرفع من التعامل من الندية، خصوصاً أمام الأخرين، بدي أتشكرك الأستاذة منور شبانه الأخصائية النفسية، يعطيكِ ألف عافية شكراً لكل هاي النصائح.

شاهد أيضاً

سوبر سبورت: جابر ينتقل من أهلي الخليل للاتحاد الاسكندري المصري

اسم البرنامج: سوبر سبورت. مقدم البرنامج: إيهاب أبو مرخية. تاريخ البث: 15 أغسطس 2017.   ...

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>