الرئيسية / البرامج / نثريات: مؤسسة دار قنديل للثقافة والفنون

نثريات: مؤسسة دار قنديل للثقافة والفنون

مقدمة البرنامج: ضحى ادكيدك

تاريخ البث: 10 مايو 2017

الضيف: أحد أعضاء فرقة قنديل، أ. علاء أبو صاع.

 

المقدمة:

رجعنالكم مستمعينا الكرام ولأولى فقراتنا والحديث عن مؤسسة دار قنديل، اللي بتختص وبتهتم بالأغاني الوطنية وأيضا الدبكة فرح، يكون معنا أحد أعضاء فرقة قنديل الأستاذ علاء أبو صاع من طولكرم

ضحى: أهلاً و سهلاً فيك أستاذ.

علاء: أهلاً فيكي وبجميع المستمعين.

ضحى: لو تحدثنا بالبداية عن مؤسسة دار قنديل كمختصة للأغاني الشعبية والوطنية؟

علاء: مؤسسة دار قنديل، هي مؤسسة للثقافة والفنون بشكل عام وللتنمية بشكل عام، وتأسست من مجموعة من الشباب يعني الناشطين، وفي أكثر من الجانب الفن، سواء موسيقى غناء مسرح غنا، مسرح رقص معاصر أكثر من مجال يعني.
ضحى: ممكن خلينا نحكي الإشي المشهور منها، الأغاني المنتشرة وبشكل كتير كبير خاصة الأغاني الوطنية اللي فيها هاي الصبغة الوطنية، اللي بتدافع عن فلسطين واللي أيضا بتعبر عن آهات الشعب الفلسطيني.

علاء: يعني الفقرة تأست بال2005، هي اللي تأسست نتيجة الإحباط العام اللي كان بعاني منه الشعب الفلسطيني، لما ما كان في أفق سياسي كان يعني في انتفاضة تقريباً ثانية ع الأبواب، والناس محبطين وبدهم يعبروا عنهم فإحنا يعني اطلعنا زي الصوت اللي من أصوات الناس مكناش فرقة كنا ناس عاديين بنحاول نعلي صوتنا.

ضحى: يعني بجمعكو حب الفن والغناء؟

علاء: كان بجمعنا إحنا شغلنا بالفن إحنا بشكل عام بالمؤسسة، لكن النا يعني بالفرقة تشكلت لتعبر عن صوتنا الفردي، وعن صوت كثير من الناس المقهورين مش عارفين يعبروا عن حالهم فش مجال أصلاً يعبروا عن حالهم، فإحنا طلعنا بهاي الكلمات والألحان اللي كانت وجدان الشعب في هديك المرحلة، وكان الحكي اللي إحنا بنغنيه كان شوي بتميز بالشجاعة كان قليل ناس اللي ممكن يعبروا عن وجهة نظرهم وعن آرائهم.

ضحى: وأيضا كان لإلكو عروض داخل فلسطين وخارجها؟

علاء: بصراحة يعني إحنا تفاجئنا كديش إنه الناس التفت حولينا، وإحنا فش عنا اعلام قوي أصلاً لكن قوة الأغاني نشرتها بين الناس، بين كل فئاتهم كانوا يحبوا هادا الإشي اللي بنسويه واللي خلا كتير من الناس يطلبونا، وع أساسه إحنا طلعنا برا لدول عربية عديدة ودول أوروبية.

ضحى: يعني شاركتوا بمشاركات؟

علاء: عدد خيالي من العروض.

ضحى: كمان شوفي كمان غير الأغاني والفرقة الموسيقية عندكو ايش في كمان أنشطة؟

علاء: في عنا إحنا شغل اليدوي كثير، متل إعادة تدوير حسب الأساس الفني هادا كان إحنا حطينا أساساته بفلسطين قبل بجوز 9 سنين، اللي هو إعادة تدوير المشاتيح كل المخلفات لصناعة أشياء فريدة، وتدريب الناس وتعليمهم ع المهارات في عنا ندوات، عروض السينما، مشاريع اللي الها مشاركة مجتمعية، يعني هي دار قنديل متسعة في المواهب الشابة في عيد العمال ع الطريقة الفلسطينية، أكثر من نشاط بصراحة ممكن أكثر اللي بحب ومعني يفوت ع الفيسبوك دار قنديل للثقافة والفنون ممكن يطلع أكثر ع برامجنا.

ضحى: برأيك الأغنية الشعبية أديه الها أهمية في عملية التحرر، بنعرف انه في توجهات بتقلك المقاومة ممكن تكون بالفن بالدبكة؟

علاء: يعني بصراحة بقلك بحطوش بالمرتبة الأولى الفن، لكن بقدر أقللك يعني أداة سحرية في بعض الأحيان إنه يعني بتخلي البني آدم يعبر عن حاله بشوية حصانة كمان، انه مش طالع ع المسرح وبحكي لا ممكن تكون بأغنية تعبر عن وجهة نظره، ويقاتل الظلم كمان سواء المحلي أو الجاي من الاحتلال كله بكافة أشكاله، وكمان انه بنوصل صوتنا ووجدانا لوجدان الناس كمان الناس ووجدانه بحاجة لتحريض، وهاي الأغاني بتشتغل شغل التحريض الوجداني

ضحى: بهاي الاغاني انتو كمان بتكبتوها وبتلحنوها؟

علاء: صحيح إحنا بنكتب وبنلحن، وللعلم إحنا مش دارسين موسيقة، أو اشي إحنا تشكلنا بشكل عشوائي وكان عنا قدرات ومواهب موجودة جوا، ولحسن حظنا انها طلعت المواهب منيحة بتوازي الاحتراف؛ يعني فانه هادا كله بشكل فردي انه من طولكرم بطلع كله الكلمات الألحان وصار يمتد الاشي، صار عنا كتير ناس بودولنا كلماتهم وبحبوا انه يعني دار قنديل تعبر عنهم.

ضحى: ممكن الاشي سطع نوركوا يعني بعد نعمان، فتحكيلي عن هاي التجربة.

علاء: نعمان .. يعني نعمان انا اللي كتبتها ولحنتها بس انه هي كانت جاية مني بشكل فردي بشكل شخصي، أنا كنت شوي سهيت وأنا كنت بالمؤسسة فصرت أحلم بالموضوع بس هادا الحلم أكيد جاي بالواقع انه بعتبر عن الانسان الفلسطيني، الانسان الفلسطيني الصح اللي متخلاش عن قيمه اللي بنشوفه هسا في انهيار لكل القيم إحنا بنأكد في هاي الأغنية انه الفلسطيني الأصلي، أصلاً لازم انه يعني يواجه كل الصعوبات لازم يتأقلم مع كل اشي لازم ما يكونش أناني ولازم عدم المؤاخذة منحط في أفكاره وقيمته، لازم يضله بني آدم برغم انه مش حاصل ع كتير أشياء الا انه الثقة والمبدأ والسلوك كمان القويم اللي هو مربوط بالأصالة والمبادئ، لازم يضل يحافظ عليها

ضحى: أنا بتشكرك جدا علاء أبو صاع أحد أعضاء فرقة قنديل.

طالعين لفاصل صغير وبعدها مكملين برامجنا فخليكم معنا.

شاهد أيضاً

سوبر سبورت: جابر ينتقل من أهلي الخليل للاتحاد الاسكندري المصري

اسم البرنامج: سوبر سبورت. مقدم البرنامج: إيهاب أبو مرخية. تاريخ البث: 15 أغسطس 2017.   ...

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>