الرئيسية / البرامج / الصحة عال: العبوات البلاستيكية والخطورة من إعادة استخدامها

الصحة عال: العبوات البلاستيكية والخطورة من إعادة استخدامها

Group plastic bottles of water on blue background; Shutterstock ID 88913350; PO: aol; Job: production; Client: drone

مقدم البرنامج: سماح مناصرة.

تاريخ البث: 3 يونيو 2017.

الضيف: رئيس صحة البيئة في مديرية شمال الخليل، د. ياسر عيسى. 

 

المقدمة:

تحياتنا إلكم مستمعينا، حيا الله بكل المنضمين لسماع برنامج الصحة عال، وإن شاء الله تضلكم بخير وبعافية، بموضوع جديد في حلقتنا لليوم بنحكي فيها عن علب بلاستيكية، ممكن نشتريها يكون فيها مي أو يكون فيها عصير، نرجع ونغسل هاي العبوة ونرجع نعبي فيها مي من أول وجديد وممكن نحطها بالثلاجة أكثر من شهر وشهرين، نضل نستعملها بشكل دائم، هون من سؤال المستمعين أنه ممكن تسبب لإلنا الضرر وليش، رح أناقش هذا الموضوع أكثر مع رئيس صحة البيئة في مديرية شمال الخليل، الدكتور ياسر عيسى، أهلاً وسهلاً فيك دكتور مساء الخير.

د. ياسر: أهلين فيكِ وفي السادة المستمعين، كل عام وأنتِ بخير.

سماح: أهلاً وسهلاً بحضرتك وأنت بألف خير، دكتور ياسر الأشخاص إلي ممكن يشتروا بعض قوارير المي، وبرجعو يعبوها مرة جديدة، بنضل وما بينتيهو أنهم غيروها ولا ما غيروها لأنه كلها بتحمل نفس الشكل ونفس الحجم، هون السؤال أنه ممكن تسبب إلنا ضرر وليش؟

د. ياسر: إذا إحنا بدنا نجي نحكي عن العبوات البلاستيكية التي يتم إعادة استخدامها، طبعاً هو للمواد الغذائية ولما نحكي مواد غذائية من السوائل سواء كانت مياه معدنية أو عصائر فهي تعتبر مواد غذائية، لا يجوز أو خلينا نحكي أنها تحمل أضرار صحية كبيرة، في حال تم إعادة استخدامها لأكثر من مرة، العبوات البلاستيكية لو كل واحد فينا انتبه للعبوه من الأسفل، بكون عليها إشارة مثلث وبكون في أحيانا حرف الـ”b” أو “bE”، مع رقم، طبعاً هاي الأرقام تعني عدد مرات إعادة الاستخدام، يعني ممكن يكون (b1 ،b2 ،33 ،b4 ،b5) أكثر من(8،7،6، 5)، لما تجي تتطلعي على الأرقام من (5) وأقل بكون إعادة استخدامها عالي الخطورة، يعني لا يجوز أنك تستخدمها بشكل كبير، مرة واحدة بتفرغ محتوياتها لا يجوز أنك تعاود تستخدمها كمان مرة، تحط فيها سوائل أو تأخذها في شنتك، أو تحطها في الثلاجة أو تحطها في السيارة عشان تستخدمها كمان مرة، ليش؟ لأنه ممكن تتعرض لتفاعلات بين السائل الموجود فيها مع العبوة المصنوعة منها، المواد الخام المصنوعة منها، فممكن مع المدة يصير في تفاعل وتحلل لهاي المواد الكيميائية وتدخل في السائل إلي أنت بتشربو في حاله إعادة الاستخدام أكثر من مرة، عشان هيك من ناحية أضرار صحية نعم يوجد هناك أضرار صحية و عالية الخطورة، وأحياناً تكون مسرطنة إذا تم إعادة استخدامها مرات كثيرة لنفس العبوة.

سماح: مثل هاي الأمور إحنا ما ننتبه إلها، إحنا نشتري قنينة المي وخلص، نشرب الميه إلي فيها وبنرجع نعبيها.

د. ياسر: الكثير من الناس حتى الناس المتعلمين ما بينتبهو للأشياء الموجودة على العبوة، حتى لو كان مطبوع على الملصق تاعها بكون بخط صغير والناس ما تنتبه لهذا الكلام، عشان هيك وعشان تريح راسك إحنا بنحكي انه إعادة استخدام العبوة للسوائل لا ينصح فيه، ويجب على المواطنين التقليل قدر المستطاع من هذه الظاهرة، لأنه حقيقة هي ضارة صحياً وتؤدي إلى الإضرار بصحة المواطن.

سماح: يعني حتى لو غسلوها وحتى لو نظفوها بشكل دائم فيها ضرر.

د. ياسر: عملية غسل العبوة تساعد في تلويث هذه العبوات، يعني ممكن أنت تغسلها وتكون معبية من المصنع بمي مثلاً، ويتكون معقمة وبطرق مختلفة تعقيمها، بعد متخلص أنت بدك تجي تستخدمها وخاصة عند الأطفال لما يروحوا على المدارس، تنظفها بالبيت وتعاود تعبيها، ممكن تشطفها بمياه قد تكون ملوثة وهنا بتكون نسبة تواجد الجراثيم أعلى، غير التلوث الكيميائي بجينا هون التلوث الميكروبي أو البكتيري، وهون يؤدي للإضرار بصحة المواطن وصحة الطالب وصحة الطفل.

سماح: يعني بنحكي عن أضرار كبيرة للسائل، وفي بعض السيدات بحطو فيها المكابيس المختلفة والورق والملوخية وغيرها.

د. ياسر: ويستخدموها لأغراض أخرى إلي هي العبوات الكبيرة، هون الخطورة أقل، العبوات الكبيرة بتكون مصنوعة من مادة إعادة الاستخدام بكون فيها مسموح لأكثر من مرة، بس مش بنفس السائل، يعني أنت ممكن تستخدم العبوة البلاستيكية المصنوعة زي الجرجر الكبير، والعشرين لتر والعشرة لتر ممكن تستخدمها لورق الدوالي وللمكابيس، هون ممكن يكون أقل ضرر من السوائل العادية، ممكن إنك تستخدم السوائل العادية التي تؤدي للإضرار بصحة المواطن، العبوات الكبيرة بتكون المواد المصنوعة منها أفضل من العبوات الصغيرة، خاصة عبوات المياه.

سماح: شو بدو يكون البديل؟

د. ياسر: البديل هو الإستحدام لمرة واحدة، ولكن هون نواجه كارثة بيئية لما أنت تشتري قنية المي وترميها عند التخلص منها خلينا نسميه، وعيك بصير عنا تراكم كبير للنفايات وكيفية التخلص من هاي العبوات، هي أصلاً لما احكي إعادة الاستخدام في طريقة بيئية، طريقة إني أحافظ على البيئة ولكن ما دام إعادة الاستخدام بدو يؤدي للإضرار بصحتي وبصحة ابني وبصحة المواطنين، معناه إحنا بدنا نوازن ونشوف شو الأقل ضرر ونتبعه، هل هو إعادة الاستخدام ولا أنه بهمش تتراكم النفايات وبعينا الله على تكلفتها والتخلص منها، الأفضل الاستخدام مرة وحدة، حكيت بالبداية أنه في عندنا أرقام من (1-5) و5 فما دون بتكون عالية الخطورة، 5 فما فوق فلا يوجد ضرر نهائياً من إعادة الاستخدام أكثر من مرة، ولكن تجنب استخدامها للسوائل.

سماح: ممكن نستخدم الزجاج.

د. ياسر: الزجاج هو أفضل شيء، لكن الزجاج مشكلته أنه بكون ثقيل، أحياناً معرض للكسر، بكون هو أفضل طريقة لحفظ المياه، إلي هو الزجاج أفضل من البلاستيك في حفظ المياه في إعادة استخدام العبوات.

سماح: شكراً دكتور، شكرا لكل هاي المعلومات والإيضاحات، الدكتور ياسر عيسى، رئيس صحة البيئة في مديرية شمال الخليل، يعطيك العافية.

شاهد أيضاً

سوبر سبورت: جابر ينتقل من أهلي الخليل للاتحاد الاسكندري المصري

اسم البرنامج: سوبر سبورت. مقدم البرنامج: إيهاب أبو مرخية. تاريخ البث: 15 أغسطس 2017.   ...

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>