الرئيسية / البرامج / نثريات: الجبل الأسود.. دولة أوروبية بطابع شرقي

نثريات: الجبل الأسود.. دولة أوروبية بطابع شرقي

مقدمة البرنامج: ضحى ادكيدك.

تاريخ البث: 5 يوليو 2017.

الضيف: الخبير في السياحة العالمية، أ. بدر الداعور.

 

المقدمة:

مستمعينا الكرام أهلاً و سهلاً فيكو من جديد في برنامج نثريات، الجبل الأسود هو عبارة عن دولة أوروبية وهي وحدة من الجمهورتين، إللي شكلتلا يوغسلافيا الجديدة، إلا إنه في (21) مايو (2006)، جرى استفتاء للانفصال عن صربيا وأيد هذا الإنفصال (55%)، فلحتى نتعرف أكثر عن هاي الدولة رح نستضيف معنا، بدر الداعور الخبير في السياحة العالمية وأيضاً رئيس نقابة السياحة وتجمع الحرف التراثية في الخليل، يسعد مساك وأهلاً وسهلاً فيك.

ضحى: أستاذ بدر لو نحكي لمحة سريعة عن دولة الجبل الأسود.

أ. بدر: طبعاً جبل الأسود هو أحد الدول الأوروبية، خاصة كمنطقة استقطاب سياحي، طبعاً كلنا بنعرف إنه نظام جمهوري وبرلماني، هادي البلدة من الدول اللي قام بفتحها محمد الفاتح اللي مشهودله بالفتوحات المناطق، واللي برسخ فيها مفاهيم الحب بين الديانات، ترك بصمة لسكان الجبل الأسود، هم بتغنوا في التعايش واللي بأكد هادا الكلام الموسيقا التركية موجودة في الشوارع في الجبل الأسود خاصة البلدان القديمة اللي أشبه بالأسواق القديمة في البدة القديمة عنا بالخليل، لأنه بمتاز بعض الأمور بالشوارع المبلطة بشكل كامل بكل مناطقها.

ضحى: متل ما حكينا هي فترة من الفترات خضعت للحكم العثماني، وهذا الإشي ظهر جلياً في الموسيقا، وحتى في السكان المسلمين وأيضاً وجود عدد من المساجد، فكيف صارت أحوال المسلمين بالجبل الأسود بعد الاستقلال أيضاً عن دولة صربيا؟

أ. بدر: هادي البلد خضعت لعدة حروب، وخضعت لعدة تحولات يعني في كان الفترة العثمانية كان (7) مساجد، وهدمت بالكامل إلا إنه الآن أعيد البناء، ولا يقل عن مئة وعشرين مسجد في هذه المنطقة وهادا رقم كتير عالي في منطقة صغيرة متل الجبل الأسود.

ضحى: هي مساحتها كتير صغيرة مقارنة بالدول الأخرى؟

أ.بدر: هي ما بتجاوز عدد سكنها مليون مسلمين ومسيحين، المسلمين هناك ما يقرب الثلث الموجودين لكن يعني المحبة الموجودة ما بين الطائفتين المسيحية والمسلمين، هي في قمة العلاقة رغم الإشكاليات إللي كانت بالماضي، الاضطهاد والعنصرية والترحيل اللي تعرض لإله المسلمين إلا إنه بالمرحلة الحالية بتمر بمرحلة هدوء واستقرار ما بين الثقافات المتعددة، طبعاً بنعرف انه هاي المدن الحالية في نظرة للاستقطاب السياحي حالياً بلشت في نهضة سياحية وخاصة من المناطق من عنا يعني صار الحركة بإتجاهها.

ضحى: كمان يمكن أستاذ لإنه هي أصلاً منطقة بتطل على البحر الموجود هناك، فبالتالي فيها مناطق جداً ممتازة للسياحة وأيضاً فيها غابات ومناطق استوائية وهو إشي شوي غريب في دولة أوروبية.

أ.بدر: سلسلة الجبال الموجودة فيها بتصورش موجودة في بلد تاني في أوروبا أيضاً الأسعار ما بين تركيا وما بين أوروبا وهي أقل كمان من أوروبا بإمكان أي جروب سياحي أو أي شخص حب يزور هاي المنطقة التكلفة تكون أقل مما تتصور.

ضحى: لكن عملتهم باليورو؟

أ. بدر: أكيد العملة الأساسية اليورو لكن في الإشكالية الوحيدة إنه في عدة لغات بها المنطقة لإنها تعرضت لعدة ثقافات وعدة دول سكنت هاي المنطقة فاللغة عندهم إشكالية، إلا إنه التعايش هناك مغري جداً بهديك المنطقة خاصة بما تمتلك من مقومات سياحة الرائعة جداً، يعني هي الإطلالات إللي من خلال الجبال عن المناطق اللي فيها الأنهار، الأنهار الموجودة في معظم المناطق.

ضحى: أنا بدي أتشكرك جزيل الشكر الأستاذ بدر الداعور.

شاهد أيضاً

سوبر سبورت: جابر ينتقل من أهلي الخليل للاتحاد الاسكندري المصري

اسم البرنامج: سوبر سبورت. مقدم البرنامج: إيهاب أبو مرخية. تاريخ البث: 15 أغسطس 2017.   ...

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>