الرئيسية / البرامج / الصحة عال: تأثير الهواء الملوث على الإنسان

الصحة عال: تأثير الهواء الملوث على الإنسان

مقدمة البرنامج: سماح مناصرة.

تاريخ البث: 24 يوليو 2017.

الفقرة: الثانية.

الضيف: استشاري الأنف والحنجرة بعيادة الخليل في مجمع الرشاد، د. جهاد البابا.

 

المقدمة:

تلوث الهواء وجود مواد  غازية أو صلبة أو سائلة وبتغير خصائص الهواء، وبالتالي تلحق الضرر بالبيئة والإنسان والحيوان والنبات، فاليوم بدنا نحكي أكثر عن تلوث الهواء،  وكيف ممكن هاي التأثيرات تنتقل للإنسان، نحن كبشر كيف بالإمكان نحمي أنفسنا من الهواء اللي بنستنشقه، ما بنعرف إذا ممكن هذا الهواء كان سليم أو غير صحي ونحمي أنفسنا من هاي الأضرار، راح نناقش موضوعنا ونتعرف على التفاصيل ونجاوب على مجموعة من الأسئلة اللي وصلتنا من حضراتكو، ضيفنا الدكتور جهاد البابا استشاري الأنف والحنجرة بعيادة الخليل في مجمع الرشاد، أهلا وسهلا فيك مساء الخير.

د. جهاد: أهلا وسهلا فيكِ، مساء الخير.

سماح: اليوم نحكي دكتور عن تلوث الهواء وتأثيره على الصحة، بدايةً الهواء المحيط فينا كيف ممكن نعرف إنه ملوث، شو بيحتوي ونسبة التلوث فيه، وكيف بالإمكان معرفتها؟

د. جهاد: ملوثات الهواء عديدة وكثيرة من مصادر متعددة، الأساس فيها الغبار اللي بيجي مع الرياح، وفي بعض المواسم بتيجي حبوب اللقاح من الشجر في فترة الزيتون وفترة اللوزيات، والروائح الكيماوية، اللي هي بتنتج من المصانع ومن السيارات ومن الحرائق، ومش بس الدخان بكون ضرراً بطلع مواد بتكون ضرراً أكثر من الدخان اللي بيطلع منها، هلأ أي مواد بنستنشقها كان عبر الأنف أو الفم، وإذا الإنسان استنشق الدخان عن طريق الأنف معناته دخل الهواء على الرئتين من مواد مؤذية، هلأ في المواد الكيماوية اللي هي ناتجة عن السيارات وعن المصانع البلاستيكية أو المواد الزراعية وكل هاي تؤثر على الجهاز التنفسي، إذاً الجهاز التنفسي والعينين والجلد والرئتين يتأثر بأي تلوث بالهواء، كيف نقي ما هو ممكن هلأ بالنسبة للسيارات ونحن الحمد الله سيارتنا كثير وزادت المباني في الشارع أيضاً، وعلى الأقل نتحاشى نمشي بالشارع المزدحم، والناس اللي عندهم أمراض صدرية والناس اللي عندهم أزمة ربو يفضل إنهم يتحاشوا فترة الذروة، بالنسبة للمصانع يجب أخذ الدقة في كمية الغبار والروائح والكيماويات، حتى حجم حبيبات الغبار إلها مقاس، يجب المصانع تكون إلها مقاسات معينة وطريقة تهوية معينة، حتى الارتفاع تبع المصنع له مقاسات.

سماح: صحيح، وهذا اللي بيحمي العمال أنفسهم المتواجدين في المصنع، وبيحمي كل الأشخاص المحيطين بهاي المنطقة.

د. جهاد: يعني نحن للأسف حتى الآن قصة المناطق الصناعية مش متنشطة وكلها موجودة وسط المساكن، وهاي المشكلة تتحمل مشكلتها وزارة البيئة والبلديات، ويجب عليها إنه تشيل كل الورش من بين المساكن، لإنه إنتِ بتتعرضي يومياً لكذا نوع من المواد الكيماوية سواء من دخان السيارات وسواء من الغازات وسواء من كذا نوع من الغبار والدخان، كل هاي القضايا تؤثر على صحة الإنسان مش شرط اليوم.

سماح: بالزبط، يعني خلينا نحكي هاي النقطة بالتحديد إنه كثير من الأشخاص اللي بعملوا في المصانع أو بتعرضوا لازدحام بحركة السير مهو بحكوا هينا كل يوم بنروح للمصنع وكل يوم بنخرج للشارع ما بصير فينا شي، رشح بسيط وممكن يروح مع الأيام، لكن تراكم هاي الأمور شو ممكن يسبب فعلاً للإنسان؟

د. جهاد: بيعمل تليفات للرئتين وبيعمل حساسية ربو، لكن التعرض لهذا الكم من الكيماويات والقضايا هاي والغبار، على المدى البعيد يؤدي إلى مشاكل في الصدر ويصعب حلها، وتؤثر على صحة الناس وتؤثر على نفسيتهم، وفي ناس بتحكي صحتلنا شغلة ببلاش في مصنع، لا حبيبي طالما في غبار في المنطقة صحتك مهددة وصحة الناس اللي حوليك أيضاً مهددة، لذلك يجب الاهتمام بالهواء والهواء هو الأكسجين، والأكسجين هو أساس الحياة، وإذا نحن بدنا نوخذ هواء ملوث اليوم ما بصير شي بس بكرة أكيد راح يصير، والأطفال اللي عندهم حساسية ربو وعلى الأهالي أن يبعدوهم عن المناطق المزدحمة بالسيارات؛ لإنه ممكن تجيبهم نوبة ربو حادة يا بتلحقه يا ما بتلحقه، وهاي ثقافة عامة، وابعدوا عن الزحمة وابعدوا عن المناطق المليئة بالسيارات والمصانع.

سماح: يعني مش بس إنه ناخذه للطبيب ويعطيه دواء ومضاد حيوي وخلص.

د. جهاد: يجب الحفاظ عليه بالحماية أهم من العلاج.

سماح: بدي أتشكرك أكيد دكتور شكراً لكل هاي المعلومات والإيضاحات الدكتور جهاد البابا، يعطيك ألف عافية.

شاهد أيضاً

سوبر سبورت: جابر ينتقل من أهلي الخليل للاتحاد الاسكندري المصري

اسم البرنامج: سوبر سبورت. مقدم البرنامج: إيهاب أبو مرخية. تاريخ البث: 15 أغسطس 2017.   ...

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>