الرئيسية / البرامج / نثريات: “فينيسيا” معجزة إيطاليا المائية

نثريات: “فينيسيا” معجزة إيطاليا المائية

مقدم البرنامج: ضحى ادكيدك.

تاريخ البث: 26 يوليو 2017.

 

 

المقدمة:

رجعنالكم من جديد مستمعينا الكرام أولى فقراتنا والحديث عن البندقية أو فينيسيا الإيطالية هي مدينة بتسحر الزائرين بطرقها المائية وهي من أكتر الأماكن السياحية شعبية في أوروبا وأدرجتها اليونيسكو ضمن  قائمة أجمل المحميات الثقافية بتوافد لإلها أكتر من (10) ملايين سائح سنوياً اليوم راح نروح بجولة للمدينة المائية لطالب درس هناك وزار المدينة.

ضحى: أهلاً وسهلاً فيك مأمون.

مأمون: أهلاً وسهلاً فيكي.

ضحى: بالبداية تحكيلنا أكثر شيء مميز بفينيسيا؟

مأمون: طبعاً الإشي المعروف بمدينة “فينيسيا” والمميز إنها مجموعة جزر متصلة مع بعض والشوارع فيها عبارة عن ممرات مائية اللي هي من البحر اللي بتطل عليه، هادا أهم إشي بميز مدينة “فينيسيا”.

ضحى: وهادا الإشي مش كتير متعارف عليه أو غريب بالنسبة لإلنا إنه نشوف مدينة طرقاتها ممرات مائية وبربطها جسور بين بعضها.

مأمون: لما الواحد يروح هناك ويشوف كيف الناس عايشين ويحاول يعكس عيشتنا هون كيف بتعتمد كتير على السيارات وعلى الطرق ممكن يصير معه شوية إنفصام بس لا لما يوصل هناك ويشوف إنه تغلب ع هديك المشاكل من خلال إنهم صمموا سيارات تتطابق مع الممرات المائية الموجودة هناك.

ضحى: يعني هناك ما في إزعاج ما في صوت زمامير ممكن الطابع اللي بتمتاز فيه طابع الهدوء.

مأمون: هادئة جداً.

ضحى: ما بعرف ممكن شو أبرز الأماكن التاريخية أو الأثرية الموجودة هناك، يعني في موجود كنائس أو ممكن أماكن سياحية معروفة.

مأمون: مزبوط أهم المعالم اللي أي سائح بزورها بمدينة “فينيسيا” جسر الموجود جزر القنال، القنال هاي أكبر قناة مائية من ناحية خلينا نحكي العرض موجود في قلب مدينة فينيسيا هادا الجسر القنال لازم أي حدا يروح هناك ويزوره الجسر بذات نفسه معمول في سوق يعني بتقدري تتسوقي فيه والإطلالة تبعته جميلة جداً كمان في عندك من أهم الشغلات اللي لازم نزورها إللي هي الساحة الموجودة هناك في منطقة سان زكريا، هاي الساحة مشهورة جداً اللي فيها بكون موجود الحمام المسالم إللي مجرد بس تمسكي حبة بسكوت رح تلاقي إنه تعرضتي لهجوم لعدد كبير من الحمام.

ضحى: كمان يعني ممكن نحكي لما بنحكي إنه عنا (118) جزيرة البندقية مكونة من الكم الهائل من هاي الجزر ممكن تكون كل جزيرة عن جريرة تانية فيها إشي مميز أو فيها إشي بجذب الواحد لحتى يزورها وينتقل بين الجسر المختلفة.

مأمون: بالزبط، خلنا نقول بالجزيرة الرئيسية في كمان معلم مهم، إنه الناس تزوره اللي هم جسر التنهدات، قصته إنه عبارة عن جسر بوصل بين مكتب الشرطة والسجن، فكانوا مثلاً زمان لما يجيبوا واحد يسجنوه في فينيسيا يعدوه من هادا الجسر عشان يعدوه من هادا الجسر ويكون بأجمل مدن العالم بس هو فعلاً بالجسم فيقعد يتحسر ويتألم بالمشكلة إللي هو فيها، فلهيك سموه جسر التنهدات، وكمان من أهم الجزر اللي لازم تنزار، جزيرة مورانو إللي بتتميز بصناعة الزجاج هو فعلياً قريب من صناعة الزجاج إللي بتصير بالخليل إلا إنه التصاميم الموجودة هناك، فعلاً إبداعية أفكارها إبداعية جداً بتبهر الناظرين وبتبهر السياح من كثر براعتها وكثر دقتها في كمان جزرة اسمها بورانو تعتبر الأهدى جداً هناك هي بعيدة شوي عن مجموعة الجسر، إللي ساكنين فيها ناس هاديين جداً، وكبار في السن وفعلاً فعلاً هاي فرصة جميلة جداً للواحد إنه يتعرف على ذاته من خلال الهدوء الموجود هناك.

ضحى: تحكيلي بما إنك زرت المكان ففي مجموعة من النصائح أو الإرشادات اللي بتحب تعطيها للناس إللي حابين يزوروا البندقية.

مأمون: بالنسبة أهم اشي الإقامة عنا بالدول العربية لما تحكي سفر وإقامة برتبط مخنا بموضوع الأوتيل ولازم يكون بنجوم ومجهز لا أنا كشب بنصح نجرب إشي اسمه الهوستيل هو عبارة عن إنه بتدفعي سعر رمزي ومخفض وقد يصل إلى (10) يورو إلك سرير بس بتروحي تنامي ع هاد السرير، وممكن (6) أشخاص بغرفة هادا الهوستيل اللي بميزه كل شباب من مراحل عمرية متقاربة بنقدر نتعرف على بعض نحكي نصائح لبعض هادا أهم اشي بنصح فيه، تاني إشي بنصح بمدينة فينيسيا إللي هو الموضوع المواصلات إللي هو يحصل على موضوع التكت إللي هي المواصلات لاللي بتكلف (30) يورو لـ(3) أيام هاي بقدر من خلالها يركب من خلالها المواصلات العامة وهي عبارة عن سفن طبعاً أنا لما حكولي أنه السفينة رح تكون فأنا قلت أكيد مواعيدها مش مضبوطة ولكن طلع بالعكس مواعيد السفن هناك مضبوطة أكتر من الباصات الموجودة في مناطق تانية هاي من أهم النصائح يعني بنصحهم.

ضحى: أنا بتشكرك لضيق الوقت كان معنا طالب درس في إيطاليا .

شاهد أيضاً

سوبر سبورت: جابر ينتقل من أهلي الخليل للاتحاد الاسكندري المصري

اسم البرنامج: سوبر سبورت. مقدم البرنامج: إيهاب أبو مرخية. تاريخ البث: 15 أغسطس 2017.   ...

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>