الرئيسية / البرامج / الصحة عال: مشتقات طبيعية تتحول لعلاج .. المضادات الحيوية ومحاذير وصفها

الصحة عال: مشتقات طبيعية تتحول لعلاج .. المضادات الحيوية ومحاذير وصفها

مقدمة البرنامج: سماح مناصرة.

تاريخ البث: 31 يوليو 2017.

الضيف: المحاضر في كلية الصيدلة بجامعة الخليل د. محمد ذويب.

 

المقدمة:

نحكي هلأ عن المضادات الحيوية هي أدوية عظيمة جداً، لكن إذا تم استخدامها بالشكل الصحيح بتعالج أنواع محددة من الالتهابات بطرق مختلفة، ممكن تتفاوت في درجة خطورتها إذا ما تم استخدامها بشكل غير صحيحن وبعضها كثير أخطر من بعضها الأخر، فاليوم بدنا نحكي كيف ممكن نستخدم المضادات الحيوية؟ من شو بتتكون بالإضافة لسوء استخدامها لشو ممكن يؤدي؟ راح ناقش موضوعنا أكثر مع الدكتور محمد ذويب، المحاضر في كلية الصيدلة في جامعة الخليل، أهلاً وسهلاً فيك، مساء الخير.

د. محمد: مساء الخير إلك وللمستمعين.

سماح: دكتور اليوم بنحكي عن المضادات الحيوية، بدايةً خلينا نعرف من شو بتتكون المضادات الحيوية؟ وشو بتعمل للجسم لما تدخل؟

د. محمد: أول ما اكتشفت المضادات الحيوية كانت مواد ناتجة من مشتقات طبيعية، أول ما اكتشفت من فطر البنسليوم واكتشفت مصادفةً، هي عبارة عن مواد تستهدف مواقع معينة في البكتيريا أو في الكائنات الحية الدقيقة المفروض إنو مش موجودة في الإنسان، فبالتالي هي خاصة بالكائنات الحية ولا تؤثر المفروض على خلايا الإنسان، لما تدخل على جسم الإنسان هي تبحث عن المستقبلات إلي لازم ترتبط فيها وبالتالي تقلل من نموها هاي لكائنات الحية الدقيقة وبالتالي تخفف من المرض الموجود حالياً عند الشخص إذا كان ناتج عن كائنات حية دقيقة أو عدوى يعني.

سماح: تمام، كيف ممكن نستخدم هاي المضادات يعني إنو طريقة وصفها بناءً على شو بتم؟

د. محمد: طبعاً هي توصف بطرق مختلفة ولكن بشكل أساسي المفروض توصف بناءً على فحوصات تبين وجود كائنات حية دقيقة زي البكتيريا أو الفيروسات، يعني ممكن عمل فحوصات معينة لخلايا الدم البيضاء  نشوف ارتفاعها وإذا كانت مش مرتفعة وكمان ممكن عن طريق فحوصات الزراعة، الزراعة هي أخذ الموجود في العدوى وزراعة هالعينة على وسط معين واكتشاف تحت الميكروسكوب، وإجراء فحصوات معينة ووجود أو عدم وجود كائنات حية دقيقة.

سماح: يعني كمان الاعتقاد الشائع إنو المضادات الحيوية مرتبطة بعمر الطفولة، هل هذا الاعتقاد صحيح؟

د. محمد: لا طبعاً المضادات الحيوية هي ممكن توصف للأطفال من عمر يوم أو حتى الكبار حتى أخر يوم من حياتهم، ولا لها علاقة بعمر معين، ولكن في مضادات حيوية لا تعطى للأطفال، وفي  مضادات حيوية لا تعطى تحت الثماني سنوات، وفي مضادات حيوية لا تعطى تحت الـ(18) سنة.

سماح: طريقة استخدام المضادات الحيوية يعني لازم هاي الجرعة إلي حددها الطبيب المختص، إنو يكون في إنهاء لإلها تماماً ولا مجرد ما يختفي المرض وأعراض المرض إنو ممكن خلص نوقف استخدامها.

د. محمد: هو كان الاعتقاد المسبق لازم الشخص يخلص الكورس كامل من المضادات الحيوية، ولكن في دراسة حديثة نشرت حتى في هذا الأسبوع بالضبط، بتحكي إنو مش الضرورة الشخص يخلص كل الكورس كاملاً، وإذا لاحظتي ممكن تشوفي حتى في شركات مختلفة من المضادات الحيوية نفس المضاد الحيوي ونفس الإسم العلمي بتلاقيه لشركة معينة لأربع أيام ولخمس أيام ولست أيام، فبالتالي هناك اختلاف يعني في اختلاف هل لازم أخلص كورس المضاد الحيوي كاملاً ولا أنا ممكن أستعمل لحد معين، بس طبعاً هو من الخطأ أستعمل لحد ما تبلش الأعراض تروح، وهو في حد أدنى لعدد الأيام إلي ممكن أستعملها في المضاد الحيوي.

سماح: تمام، وأيضاً شراء المضادات الحيوية على العاتق الشخصي، يعني التهابات اللوز بلاحظ بعض الأمهات بتروح للصيدلي بدي مضاد حيوي وبتوصفله إياه وخلص.

د. محمد: خطأ كبير، وحالياً صار عنا قوانين تمنع ذلك، يعني صار عنا قوانين خصوصية بالمضادات الحيوية لازم أنا عشان أصرف المضاد الحيوي من الصيدلية، لازم يكون عندي وصفة طبية مبنية على تشخيص صحيح مش زي أول، وحالياً أي صيدلية بتبيع مضادات حيوية بدون وصفة طبية، مفروض إنها تتخالف وتتعرض للمسائلة طبعاً.

سماح: أبرز الإرشادات إلي بتوجها لكل الناس إلي بسمعونا الأن لاستعمال كل المضادات الحيوية، كيف لازم نستخدمها بحظر؟

د. محمد: طبعاً المضادات الحيوية أول شي لازم ننتبه من موضوع الحساسية فيها، ويعني في نسبة عالية من المضادات الحيوية ممكن تسبب حساسية لجميع الأشخاص، لازم ننتبه هل الشخص معاه حساسية زي حساسية البنسلين، وثاني شي ننتبه خصوصاً في المضادات الحيوية إلي بتيجي على شكل شراب للأطفال، وننتبه إنو في أنواع منها بتنحط بالثلاجة ولازم تنحط بالثلاجة بعد ما تنحل، وفي أنواع منها ممنوع إنها تنحط بالثلاجة بعد ما تنحل، فالمفروض نقرأ على العلبة من برا ونشوف هل هو من النوع إلي بنحفظ بالثلاجة ولا لا، هل الشي الإلزامي التام بتجر على إلي كتبها الطبيب، مرات بتكون بأعشار المليمتر، يعني ممكن الدكتور يكون كاتب (1.6) مليمتر في كل جرعة،  يعنى لا (1.5) ولا (2)  فبالتالي لازم نعتبر إنو هاي الجرعة دقيقة جداً ونقيسها بطريقة دقيقة جداً مثلاً عن طريق السرنجةً إلي بتكون متوفرة مع الدواء.

سماح: تمام، بدي أتشكرك دكتور وشكراً لكل هاي المعلومات، يعطيك ألف عافية.

شاهد أيضاً

سوبر سبورت: جابر ينتقل من أهلي الخليل للاتحاد الاسكندري المصري

اسم البرنامج: سوبر سبورت. مقدم البرنامج: إيهاب أبو مرخية. تاريخ البث: 15 أغسطس 2017.   ...

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>