الرئيسية / البرامج / حواء على الهواء: الأسلوب الصحيح للرضاعة من الزجاجة

حواء على الهواء: الأسلوب الصحيح للرضاعة من الزجاجة

مقدمة البرنامج: سماح مناصرة.

تاريخ البث:  7 أغسطس 2017

الضيف: المحاضرة في كلية التمريض في جامعة الخليل، أ. زينب سليمان.

 

المقدمة:

 صباح الخير لكل المنضمين لسماع برنامج حواء على الهواء عبر موجة علم 96.1 FM، حيا الله فيكم جميعاً، لموضوع جديد في حلقتنا لليوم رح نحكي فيه عن رضاعة الطفل من الزجاجة، كيف بالإمكان إحنا نهتم بوضعية الطفل، والأمور الي لازم نتبعها في تحضير الحليب والمحافظة على جودته، سبق وحكينا إنه الملئ للمي لازم يكون بدقة مع وضع الحليب بدقة، وبدنا نحاول بقدر الإمكان إنه الحليب الصناعي يكون مشابه لحليب الأم مع أنه مستحيل، بس أنه بدنا نحافظ على جودة هذا الحليب لحتى يوصل للطفل ويساعده على الغذاء، خصوصاً بنحكي عن عمر 6 شهور ما رح يتناول الطفل إلا الحليب حتى بدون المي، رح نناقش هذا الموضوع أكثر مع الأستاذة زينب سليمان، محاضرة في كلية التمريض بجامعة الخليل، أهلا وسهلا فيكي أستاذة صباح الخير.

أ. زينب: أهلاً وسهلاً فيكي، الله يرضى عليكي.

سماح: أهلا وسهلا بحضرتك، اليوم بنحكي عن اضطرار حواء حتى ترضع طفلها من الزجاجة والحليب الصناعي، بداية خلينا نحكي عن الأمور إلي بدها تهتم فيها ما قبل رضاعة طفلها، يعني بتحضير الحليب شو لازم تعمل؟

أ. زينب: نعم انتي حكيتي اضطرار، لأنه إحنا ما بنشجع إنه الست ترضع ابنها بالزجاجة إلا إذا اضطرت، وإحنا بنشجع الرضاعة الطبيعية للطفل، الشغلات إلي كثير مهمة أنه كيف إحنا بنظف الزجاجة، إذا كانت وحدة لأنه في ستات بفضلو أنه يحضروا كل الرضعات مرة وحدة، إذا كان عندها إمكانية تغلي كل الزجاجات مرة وحدة ويكونوا معقمين ونظاف، ونحضر لكل الوجبات بغض النظر عدد الوجبات حسب عمر الطفل وقديش هو بحتاج، وإذا هي رضعات مكملة وإذا هي الأساس، مرات في ستات بطلعوا ع الشغل بس برضعوا في غيابهم بعدين بكملو رضاعة طبيعية، فبنظف وبنغلي وبنعقم الزجاجات قبل التحضير دائماً، وضروري المي تكون مغلية، وطبعاً ما بنحضر الحليب وهي في درجة الغليان، بنخليها شوي تبرد، وبنحط الكمية اللازمة من الأونصات أو من السنتيمترات إلي تحتاجها كمية الحليب البودرة، في حليب بكون المصنع حاط قديش العيار، وبتكون التوجيهات مكتوبة على علبة الحليب.

سماح: وهاي بدها تكون بدقة، بدقة متناهية.

 أ. زينب: لا تزيد غم ولا تنقص غم، وتناسب احتياج الطفل عشان نموه وتطوره.

سماح: هلأ حضرنا الحليب واتبعنا كل هاي الإرشادات، هلأ بدنا نبدأ بترضيع الطفل كيف بدنا نوضعه وكيف بدها تكون جلسته؟

أ. زينب: جلسته بدها تكون  في حضن الأم ممنوع تحطه على التخت وتسنده، هاد ممنوع منعاً باتاً، لأنه أول شيء إحنا بنخاف من شغلات كثير، بنحب يكون في صدرها عشان يكون قريب من حنانها، مرة بتحطو على الجانب اليمين ومرة بتحطو على الجانب الشمال لأنه كثير مهم ياخذ حنانها، كأنه في رضاعة طبيعية، يكون رأسه مرفوع شوي في حضنها، ورأسه كمان مسنود بالإيد، والوضع مريح، وجسمه دغري، مش مثني، ممدود ورأسه مرفوع، وبرضوا الحلمة كثير مهمه، الحلمة تكون واسعة من النهاية، وما تكون كبيرة إذا كان الطفل شهر، تكون الفتحة كثير مناسبة لا تكون مفتوحة كثير، كثير مهم إنه تكون وسط على أساس بالرضاعة تحريك الفك كثير مهم للطفل، في الوضعية هاي إنه يكون رأسه مرفوع في حضن الأم، وجسمه مستقيم ممدود وإنه يكون مدعوم رأسه، ولما بدنا نحط الحليب لازم الحلمة تكون دائماً مليانة، ممنوع تكون فارغة لأنه رح يشرب هوا، وكثير مهم كمان إنه نخلي الحلمة زي ما حكينا وسط على أساس ما ينهي الرضاعة في خمس دقائق، لازم يأخذ فترة طويلة لأنه لو رضع من صدرها، أقل شيء حتى لو عمرة 6 أو 5 شهور أقل شيء 10 دقائق بده يرضع، ففترة الرضاعة المفروض تكون طويلة، وأن لا تقوم الأم بتكبير فتحة الحلمة حتى ينهي الطفل الرضاعة؛ لأنه ممكن تشكل خطر فما يلحق على الحليب، ويتشردق، ويصير إله مشاكل، يصير يقح، الأم بتخاف من هذه الشغلات، ويأخذ فترة طويلة بالرضاعة أقل شيء 15 دقيقة، على أساس هاد بساعد على عملية تحريك الحنك، كثير مهم لقوة العضلات ولإشباع الذات عند الطفل، يعني أكثر شيء الطفل في هاي المرحلة إنه يشبع فمه، فما تكون الفترة قصيرة خمس دقائق وخلص.

سماح: بس بالعشر دقائق أو بالخمس دقائق تغير وضعيته، مرة على اليمين ومرة على اليسار؟

أ. زينب: في كل رضعة تخليه على نفس الوضعية، مثلاً في الرضعة الثانية تحطه على اليمين إذا كان على الشمال في الرضعة إلي قبل، على أساس إنه كل جسدها أكثر من منطقة ممكن يتعرض إلها في الجسد، عشان الإحساس الغريب إلي الطفل بحسه والأم بتحسه وهي ترضع.

سماح: هلأ كمان أستاذة ما بعد الرضاعة، أنهى الطفل الرضاعة بالكمية المسموحة إله بعد 15 دقيقة.

أ. زينب: بتكبها إذا ظل من الحليب، دائماً هي تخمن يعني هي تتوقع قديش هو باكل، كل ما كبر بتزيد الكمية، دائماً تحاول تحضر الكمية إلي هي تتوقع إنه هو بأخذها، عشان لو زاد ما يروح خسارة يعني، لأنه إلي بزيد لازم ينكب ما بنخزنه.

سماح: وما بعد أيضاً ما ينهي الرضاعة كمان كيف بدنا نتعامل مع الطفل، مهم أنه ندشيه.

أ. زينب: كثير مهم إنه يتدشى خاصة برضاعة الزجاجة؛ لأنه ممكن يأخذ هوا، فبندشيه على طول وبنحطه على جنبه، خاصة إذا بده ينام بنحطه على جنبه اليمين؛ عشان المعدة بتجي على الشمال، ولما نحطه على اليمين فبنزل الحليب وبتركز في المعدة فبتقل عملية إنه يرجع الطفل الحليب، هاي كثير مهمة، دائماً تنصح الأمهات تحطه على جنبه اليمين بعد الرضاعة، وتسندي ظهره على أساس ما يقلب، لأنه إذا كان خمس شهور بيقلب، على أساس الحليب يظل راكز في التجويف السفلي من المعدة.

سماح: طيب ما بعد عمر السنة بيضل الطفل بحاجة للرضاعة الصناعية، هون ممكن يأخذ الرضاعة لحاله وممكن أمه تخليه بالسرير وتعطيه الرضاعة لحاله، هون كمان كيف لازم الطفل يرضع بعد ما يوصل لعمر السنة؟

أ. زينب: لأنه هو بيحتاج لحنانها، ودائماً بنقول إنه على السنة بيقدر الطفل يمسك الكاسة وأفطمه عن القنينة، والعلم بحكي إنه بعد سنة ما لازم تضل؛ لأنه أول شيء القنينة بقايا الحليب ممكن تضل في ثمة وحتى على الستة بصير يمسكها لحاله، بس أنا برضو بضل حامليته في حضني، على السنة رح يمسكها ويلف فيها وما بده حدا يسنده أو يدعمه، وبقدر يمسك الكاسة، ودائماً الكاسة أفضل؛ لأنه بشرب منها كامل وما بصير تسوس وبقدر يقعد، مش وهو نائم، إحنا بعد السنة بنقول افطميه عن القنينة وأعطيه الكاسة، على أساس إنه هو بقدر يكون جالس ويشرب من الكاسة، وبقدر يمسك المعلقة ويأكل على سنة، لازم يتعود على مسك الأدوات بعد عمر سنة، وما أخليه على القنينة، دائماً أفطمه وبقدر أعطيه بالكاسة، بس إذا كان هو بيرضع طبيعي ما بفطمه عن صدر الست.

سماح: أكيد، بس إحنا هون بنحكي عن إنه بدنا نستبدل علبة الحليب من شكل الرضاعة لشكل الكاسة.

أ. زينب: على السنة دائماً بنصح الأمهات إنه ما تعطيه القنينة؛ لأنه بضر أسنانه بالنهاية.

سماح: هاي المعلومات أكيد مهمة لكل السيدات إلي بسمعونا إن شاء الله بتبعوها، شكراً للأستاذة زينب سليمان، محاضرة في كلية التمريض بجامعة الخليل، يعطيكي ألف عافية.

شاهد أيضاً

سوبر سبورت: جابر ينتقل من أهلي الخليل للاتحاد الاسكندري المصري

اسم البرنامج: سوبر سبورت. مقدم البرنامج: إيهاب أبو مرخية. تاريخ البث: 15 أغسطس 2017.   ...

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>