الرئيسية / البرامج / الصحة عال: كيف نحقق توزان الفيتامينات في الجسم؟

الصحة عال: كيف نحقق توزان الفيتامينات في الجسم؟

مقدمة البرنامج: سماح مناصرة.

تاريخ البث: 7 أغسطس 2017

الضيف:  أخصائية التغذية العلاجية، أ. عائشة الغزاوي.

 

المقدمة:

مستمعينا كثيراً من الأشخاص بتظهر عليهم التعب والإرهاق، وممكن هذا الشعور يستمر معهم لفترات طويلة ويصيروا يبحثوا عن العلاج اللي ينشطهم ويبعد عنهم مثل هاي الأعراض المرافقة لإلهم طوال اليوم، فبروحوا يتناولوا الفيتامينات والمنشطات باعتقادهم هي الحل الصحيح لحتى تزيل عنهم كل هاي الأعراض، فاليوم بدنا نحكي عن تناول الفيتامينات متى بكون ضرورة، شو بتأثر بكثرة تناولها على صحة الإنسان، بالإضافة النسبة الصحية للفيتامينات بالجسم حتى نعرف نقصها، راح نناقش موضوعنا أكثر مع أخصائية التغذية العلاجية، الأستاذة عائشة الغزاوي، أهلا وسهلا فيكِ، مساء الخير.

أ. عائشة: يسعد مساك.

سماح: اليوم نحكي عن الفيتامينات ونسبتها الصحيحة بالجسم، بدايةً خلينا نوضح أهمية الفيتامينات بالجسم، وفعلاً كيف ممكن تتضح الفيتامينات الموجودة داخل أجسامنا؟

أ. عائشة: بدايةً إذا بدنا نعالجها بالأول الفيتامينات هي عبارة عن مركبات عضوية، يحتاجها الجسم بكميات محدودة، في بعض هاي الفيتامينات ما بقدر الجسم إنه ينتجها، فبالتالي بنصير ندور عليها من مصادر خارجية، وهاي المصادر بتكون من الطعام، وبتيجي أهمية الفيتامينات لوظائف الجسم المختلفة، فبالتالي نقص هاي الفيتامينات بتأثر على الجسم، وتعمل العديد من المشاكل الصحية والعديد من الأمراض، الفيتامينات تقسم إلى نوعين في عنا فيتامينات قابلة للذوبان في الدهون، وعنا فيتامينات قابلة للذوبان في المي، هلأ بالنسبة للفيتامينات القابلة للذوبان في الدهون منها أربع أنواع، اللي هو فيتامين c وفيتامين e وفيتامين a وفيتامين d، هلأ بالنسبة لفيتامين c ممكن نحصل عليه من خلال الأكل، يعني مثلاً من خلال السبانخ والجزر والبطاطا والسمك والكيوي والبيض، أو جسمنا بقدر يفرز كمية معينة من هذا الفيتامين عن طريق البكتيريا اللي بتكون موجودة بالأمعاء.

سماح: يعني هلأ بنحكي إنه الجسم بفرز فيتامينات لكن ما بفرزها بكميات كبيرة، نحن بناخذ البقية من المواد الغذائية اللي نحن بنتناولها، لكن متى بكون بحاجة الفيتامينات كمكملات غذائية وأقراص دوائية؟

أ. عائشة: هلأ نحن بنقدر نوخذ الفيتامينات من أكلنا مثل ما حكينا، يعني فيتامين “د” بنقدر نوخذه من أكلنا أو تعرضنا لأشعة الشمس، هلأ إيمتا بتيجي حاجة المكملات الغذائية من خلا فحص بقرره الطبيب إنه هذا الشخص بحاجة لنوع من أنواع المكملات الغذائية؛ لأنه هو عنده نقص حاد فيه ولحتى ما تظهر عليه نوع من أعراض نقص هاي الفيتامينات وبعطينا المكمل، هلأ بعد ما يصير نسبة المكمل الغذائي بجسمنا منيحة يعني نسبة طبيعية بصير الشخص يستغني عن هذا المكمل الغذائي إن ينتبه أكثر على أكله.

سماح: يعني ممكن هون نحكي عن فقر بعض الأجسام بالفيتامينات، هذا بكون بسبب نوعية الأكل، لهيك بصير الاختلاف ما بين شخص وآخر، إنه بعض الأشخاص تظهر عندهم بعض أعراض نقص الفيتامينات والبعض الأخر لا، هذا بعتمد على نوعية طعامهم  والجسم بفرز نفس الكمية عن الكل.

أ. عائشة: يعني بنلاحظ نفس الأشخاص اللي بكونوا يعملوا حملات غذائية أو حميات خطأ، وبسحبوا نوع معين من المجموعات الغذائية بتكون موجودة بالأكل، بنلاقي هذول الأشخاص أكثر عرضة لهاي الأعراض، ممكن بعض الأشخاص يتخلوا عن منتجات اللحوم والدواجن، هذول الأشخاص أكثر عرضة إنهم يظهر عليهم هاي الأعراض.

سماح: طيب هلأ كمان إذا بدنا نراعي وجود الفيتامينات من بدايةً يومنا، شو بدنا نتناول بشكل يومي لحتى الفيتامينات دائماً تكون موجودة بأجسامنا، وما تظهر علينا الأعراض اللي راح يشخصها الطبيب إنها بحاجة للمكملات الغذائية؟

أ. عائشة: دائماً نحن بننصح كل الناس سواء كانت وجبة الفطور أو وجبة العشاء أو الغذاء إنهم يتبعوا طريقة معينة بتحضير وجبتهم، كيف يعني؟ هلأ مثلاً الشخص بده يحضر وجبة الفطور لازم أركز على وجبة الفطور على النشويات وعلى الخضار والفواكه، وضروري ننوه إنه الخضار والفواكه هي أهم المصادر الفيتامينات والمعادن اللي بحتاجها الجسم، هلأ النشويات بكون موجود فيها أكثر فيتامين “d” وهي نوع من الفيتامينات القابلة في المي، وكمان لازم أحط نوع من أنواع البروتين، مثلاً بدي أحط لبنة وبدي أحط حمص، وهيك أنا بتكون وجبتي الغذائية كاملة ومتكاملة، وكمان هذا الشي نقلوا على وجبة الغذاء نفسها، يعني بده يكون عندي برغل ورز وفريكة هذا من النشويات، والبروتين دجاج أو لحمة أو سمك، وبده يكون عندي خضار سواء كانت صواني أو شوربات، وهيك لازم تكون الوجبة الغذائية وجبة كاملة ومتكاملة، وضرورة التركيز على الخضار والفواكه.

سماح: صحيح، هون نحن بنضمن الفيتامينات دخلت لأجسامنا بكمية الفيتامينات الأصلاً موجودة بالجسم، هذا كافي لحتى يحفظ توازن الفيتامينات في أجسامنا وتكون النسبة صحية وصحيحة، وما نحتاج للمكملات الغذائية وما تظهر علينا أعراض نقص الفيتامينات، شكراً للأستاذة عائشة، يعطيك ألف عافية.

شاهد أيضاً

سوبر سبورت: جابر ينتقل من أهلي الخليل للاتحاد الاسكندري المصري

اسم البرنامج: سوبر سبورت. مقدم البرنامج: إيهاب أبو مرخية. تاريخ البث: 15 أغسطس 2017.   ...

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>