الرئيسية / البرامج / حواء على الهواء: يأكلون ولا يزيد وزنهم .. ما السبب؟

حواء على الهواء: يأكلون ولا يزيد وزنهم .. ما السبب؟

تقديم: سماح مناصرة

تاريخ البث: 8 أغسطس 2017

الفقرة: الثالثة

الضيف: استشاري التغذية العلاجية وعضو الجمعية الامريكية للتغذية، الدكتور أسامة صلاح.

 

المقدمة:

يسعد صباح كل المنضمين لسماع برنامج حواء على الهواء عبر موجة علم 96.1FM، أكيد بنشوف كثير من الأشخاص اللي بياكلو وما يسمنوا رغم كثرة تناولهم للوجبات الغذائية، كثير من المواد الغذائية اللي ممكن إنه لو يفكر فيها الشخص السمين مكن إنه كمان ينصح، فهذا الأمر ببحث عنه بعض الأشخاص عن إجابات لهذا الموضوع، ليش بياكلوا وما ينصحوا وإحنا مجرد ما ناكل شيء بسيط يرتفع وزنّا؟ فهذا الموضوع اللي رح نتعرف عليه أكثر اليوم مع الدكتور أسامة صلاح، استشاري تغذية علاجية وعضو الجمعية الامريكية للتغذية، دكتور أسامة أهلا وسهلا فيك صباح الخير.

د. أسامة: أهلا وسهلا بحضرتك وبالمستمعين الكرام، صباح النور.

سماح: أهلا وسهلا بحضرتك، يعني الشخص اللي بياكل بياكل وما بسمن، هاد بكون شخص مستفز كثير للأشخاص البدناء، خلينا نتعرف على الحقائق اللي بتكون وراء هذا الموضوع، إنه ليش بياكل وما بسمن؟  

د. أسامة: هاي حالة مش مرضية بس بتكون عملية التمثيل الغذائي عند هؤلاء الأشخاص أكثر من غيرهم، يعني بحرقوا طاقة لعدة أسباب، ممكن طبيعة عملهم مثلاً، بفكروا أكثر من اللازم، أو حركين كثير، أو ممكن يكون التمثيل الغذائي بالجسم بكون أكثر من غيرهم بدرجات، ليس بالضرورة أن تكون حالة مرضية، إذا كانوا متضايقين من حالهم وبدهم ينصحوا في أكثر من طريقة وفي ناس بحسدوهم على أنه بياكلو كثير وما ينصحوا، وهم نفسهم بدهم ينصحوا، والاكل هو متعة والكل بحب يأكل، بس مين بحسدهم أو بغار منهم أو بتضايق من وضعهم اللي عندهم وزن زائد أو بعانوا من سمنة.

سماح: طيب هون ممكن إنه يتناولوا نفس الوجبات الغذائية يقوموا بنفس الحركة، يعني بيعملوا مثلاً في نفس المكان وتناولوا نفس الوجبات الغذائية، حركتهم تقريباً نفس الشيء، فليش هاد بنصح وهاد ما بنصح، هون بتصفي أيضاً علامات الاستفهام.

د. أسامة: نعم، كل جسم إله خصوصيته، بنرجع وبنقول بتكون عملية التمثيل الغذائي داخل جسمهم أسرع من غيرهم، بسبب شيء بتعلق بالغدد مثلاً بالغدة الدرقية أو شيء بتعلق في عملية الامتصاص في الجسم، أو طريقة الهضم، أو في السلوكيات الغذائية بشكل عام، إذا كان بنزل بسرعة أو بضعف بسرعة، أو مثل بكون عندهم وبجوز ما بحكوش بنشوف الناس اللي بتأكل كتير وبتنصحش بجوز تكون عندهم شغلات معينة، إسهالات كثيرة مثلاً أو بروحوا على الحمام كثير، بكون عندهم مشاكل في عملية الامتصاص، ما بيعرفوا وهاي قد تكون حاله مرضية، يعني في الأسباب هاد، بتكون بحاجة لتقييم للي بعانوا أنه بياكلوا كثير وبنصحوش، أو اللي بشوفوهم وباكلوش قدهم وبينصحوا، الجسم زي ما حكتلك إله تقييم خاص.

سماح: تمام، لكن لازم يكون في كشف عن هذا الموضوع مثل ما تفضلت، إنه هم بياكلوا وما بينصحوا لأنه التمثيل الغذائي عندهم شغال أكثر من غيرهم، ولا بياكلوا وما بينصحوا لأنه عندهم حالة مرضية.

د. أسامة: بالزبط، إذا كانوا بياكلوا وبدهم ينصحوا بجوز يكون في عندهم مشاكل في الأمعاء ممكن البعض يسميه الاتهام العصبي أو الطعم الغذائي، بكون عندهم طفيليات في الأمعاء وبكون عندهم مشاكل في نقص معادن معينة أو فيتامينات معينة، هون بنرجع للتقييم، قد تقيم إذا حالة مرضية وناس بعرفوش، بالصدفة بشوف ناس مثلاً عنده نحافة زايدة بقول يا دكتور بناكل كثير بس بعرفوش إنه وضعهم الحالي هذا النحافة أو الجسم الهزيل بكون بحاجة إنه في فرص ثانية الناس بتساعدهم يعني، سواء كان بطبيعة الغذاء أو توزيع الغذاء أو إذا كان بتطلب إعطاء مكملات غذائية أو عمل بعض الفحوصات اللي بتسعدهم.

 سماح: يعني هون فعلاً بكون في البعض منهم بكون هذا الأمر مزعج إلهم، بكون بدهم ينصحوا، وبدهم أنه يزيد وزنهم لو بكيلوغرامات بسيطة، وإنهم بياكلوا كمان ما بينصحوا، فهون بصيرو يبحثوا عن وسيلة لزيادة الوزن، هون شو بتنصحهم دكتور؟

د. أسامة: اللي بده ينصح أصعب من اللي بده يضعف، يعني اللي بده يضعف بده يتابع بالعيادة كل أسبوعين مرة، أما اللي بده ينصح بده كل أسبوع مرة، فبنصحهم يعملوا فحوصات بشكل عام، يعني يلجأ للمراكز والعيادات العلاجية، بحددوا شو السبب إذا كان السبب عضوين أو بكون في عملية توزيع أو تركيز على نوعية الوجبات أو طريقة تناولها، هذا برضو بتساعد في إنه تخليه يزيد وزنهم.

سماح: كيف بدها تكون نوعية الوجبات وكيف بدها تكون الطريقة؟

د. أسامة: يعني اللي بده ينصح أكيد الأكل بيكون موجود، وفي كمية زائدة مثلاً معينة، بس أنه كيف تتأخذ، طبيعة النشاط الجسماني ننصحهم فيه إذا كان مشي أو إذا كان مشي خفيف، أو أنه مثلاً ما يأكلوا كمية كبيرة من الخضار، أو أنه يأكلوا خضار بس بحد أدنى، أو أنه يعززوا وجباتهم خمس ست مرات في النهار، مش مرة أو مرتين أو ثلاث، ونقلهم إيش الغذاء اللي يتناولوه بحيث أنه وزنهم يزيد بطريقة معينة ما تؤثر على أعضاء الجسم، كالكلى أو الكبد، وفي نفس الوقت يحس أنه في هناك زيادة ملحوظة بالوزن، بجوز يكون هناك في عامل نفسي مثلاً، بكون في ناس ما بحكو لحدا وبكونوا أصلاً بفكروا بالأكل كثير ويأكلوا كثير بس أنه بكون عندهم نوع معين هاجس معين، انه بدهم يزيدوا وبوزنوا حالهم في النهار مرة ومرتين، هاي بتلعب دور كمان في عملية التمثيل الغذائي داخل الجسم.

سماح: الأشخاص اللي بدهم كمان ينقص وزنهم ممكن وكثرة التفكير في هذا الموضوع بوصل لمرحلة إنه فعلاً بتبع حميات غذائية ولكن وزنه ما بنقص لأنه دائم التفكير بهذا الموضوع.

د. أسامة: برضو هون عملية تخفيف الوزن إلها طريقة معينة، في ناس بحكو هي إحنا بناكلش بنحرم حالنا، الأكل متعة والجسم بحاجة لأكل معين، بس أنه عملية توزين الغذاء سواء من الناحية الكمية والنوعية، بتلعب دور في الحفاظ على وزن صحي مش وزن مثالي، الناس بتحرص على أنه يكون في وزن صحي بطريقة معينة، كمان اللي بتبعوا أنظمة عشوائية بنزلوا وزن بشكل سريع في فترة بسيطة ولكن ممكن يكسبوها بطريقة أسرع وبعد محاولة أو محاولتين ببطل جسمهم يستجيب لهاي البرامج.

سماح: والتوعية سواء للأشخاص اللي بدهم يزيدوا وزنهم مش بطريقة عشوائية وللأشخاص اللي بدهم ينقصوا وزنهم كمان مش بطريقة عشوائية، الأكل متعة والجسم بحاجة للغذاء، ولكن للغذاء الصحي بالمواعيد المناسبة وبالكميات المناسبة، ولأصناف أيضاً المناسبة، بدي أتشكرك دكتور، يعطيك ألف عافية، شكراً لكل هاي الإيضاحات والمعلومات، استشاري تغذية علاجية وعضو الجمعية الأمريكية للتغذية.          

 

شاهد أيضاً

سوبر سبورت: جابر ينتقل من أهلي الخليل للاتحاد الاسكندري المصري

اسم البرنامج: سوبر سبورت. مقدم البرنامج: إيهاب أبو مرخية. تاريخ البث: 15 أغسطس 2017.   ...

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>