الرئيسية / البرامج / حواء على الهواء: أطعمة تساعد على التخلص من السيلوليت

حواء على الهواء: أطعمة تساعد على التخلص من السيلوليت

مقدمة البرنامج: سماح مناصرة.

تاريخ البث: 13 أغسطس 2017.

الفقرة: الثالثة.

الضيف: استشاري تغذية علاجية ونائب رئيس الجمعية السعودية للغذاء والتغذية، د. خالد المدني.

 

المقدمة:

 حيا الله فيكم مستمعينا تحياتي لكل إلي انضموا لسماع برنامج حواء على الهواء عبر علم اف ام، أطعمة بتساعد في التخلص من السيلوليت، هذا إلي بظهر على شكل خطوط في الجلد، بتكون مزعجة وممكن إنه نجرب العديد من الوسائل حتى وإن انخفض الوزن، ولكن هاي الخطوط بتضل موجودة، اليوم بدنا نعرف عنها أكثر والأطعمة إلي بتساعد في التخلص من السيلوليت، رح نحكي بهذا الموضوع مع الدكتور خالد المدني، استشاري تغذية علاجية ونائب رئيس الجمعية السعودية للغذاء والتغذية، بنضم إلنا من السعودية، أهلا وسهلا فيك دكتور خالد، صباح الخير.

د. خالد: صبحكم الله بالهنا والسرور الله يبارك فيكم ويسلمكم.

سماح: حيا الله فيك، يا هلا ويا مرحبا، دكتور اليوم بنحكي عن السيلوليت، بداية خلينا نوضح شو هو وكيف بتكون بالجسم، هو عبارة عن شو؟

د. خالد: هو تجمعات دهنية تبرز في مناطق معينة، وبالتالي لا يوجد لها علاقة في التغذية كثيراً، وعموماً لو الإنسان نزّل من وزنة هاد بيكون العلاج الأمثل.

سماح: شو الأطعمة إلي ممكن تساعد في تنظيم الوزن وممكن تساعد كمان في التخلص من السيلوليت؟

د. خالد: عادة السيلوليت بجي للناس إلي عندهم زيادة في الوزن وبكون مرتبط بالوراثة شوي، والعلاج الأمثل بالنسبة لي هو في بعض الجلسات في بعض الأجهزة وفي بعض الوسائل، وواحد من أهم الأشياء هو تخفيف الوزن؛ لأنه عادة بيجي للناس إلي عندهم زيادة في الوزن، والإنسان عشان يخفف في الوزن في ثلاث حاجات أساسية، يعني هذا العلاج الأمثل إلي هو يغير من السلوكيات والعادات الغذائية الخاطئة ويقلل من السعرات الحرارية إلي هو بتناولها، ويزيد من النشاط البدني، هون لما أحكي أنه يغير أو يحسن من السلوكيات والعادات الغذائية الخاطئة، الإنسان مثلاً ما يأكل بسرعة؛ لأنه مثل ما بقولوا أن الإنسان لما يتناول أول لقمة فالمعدة تبدأ تفتح عشان تستقبل هاي اللقمة الأولى، فبتصل رسالة للمخ بعد حوالي عشرين دقيقة، فبالتالي الرسالة بتوصل إنه إنت أكلت وإنت شبعت فببدأ يشبع، وهذه نلاحظها أن الانسان عندما يأكل بسرعة وما يتكون أي رسالة وصلت خلال العشرين دقيقة الأولى، فبعد عشرين دقيقة بحس إنه عندة نوع من التخنة، الرسائل كلها بتوصل وبكون خلص الأكل، هذه واحدة من الوسائل، الشيء الثاني من السلوكيات الخاطئة أنه الإنسان يجوع نفسة زيادة عن اللزوم.

سماح: ويروح يأكل مرة وحدة.

د. خالد: أها؛ لأنه الإنسان لما يجوع الأكل متعة من متع الحياة، والإنسان لو جوّع نفسة ما بقدر يعمل كونترول عن نفسه؛ لأنه الأكل متعة وبكون في صعوبة إنه الإنسان يعمل كونترول وهو جعان، وممكن هو كمان يختار الأكل الصحي، ولما أقول الأكل الصحي بكون من فاكهة، وعالي في الخضراوات، وعالي في الحليب المنخفض، أو عديم السعرات الحرارية، الحبوب الكاملة، إلي ممكن نقول عليها بالقشرة الخارجية، بمعنى إحنا لو شفنا الخبز هاذ كل ما يميل للغمقان بكون أكثر فائدة؛ لأنه هون بكون يحتوي على القشرة الخارجية إلي بحكو عنها النخالة، فهذه النخالة تحتوي على فيتامينات أكثر، وتحتوي على معادن أكثر.

سماح: يعني هون بدنا نقلل من النشويات والخبز الأبيض.

د. خالد: هذا صحيح، بقدر المستطاع، ولكن برجع وبوضح إنه السعرات الحرارية إلي موجودة في كل أنواع الخبز تقريباً متساوية، سواءً كان خبز أبيض أو خبز غامق، كل ما يزيد الغمقان كل ما كان أفيد من الناحية الصحية، في ناس بسخنوا الخبز على أساس إنه يصير ناشف وبحكو هاذ فيه سعرات حرارية.

سماح: أو انه الخبز الأسود فيه سعرات حرارية أكثر من الخبز الأبيض.

د. خالد: كمان في بعض السلوكيات الخاطئة أنه لإنسان لما يكون عندة أي حالة نفسية أو يكون زعلان أو مبسوط أو مضطرب، فبسرف في الأكل هون لازم يكون في نوع شهية، عنده رغبة أنه هو يأكل، ففي هذه الحالة إذا هو غيّر تفكيره في حاجة ثانية، بعد ربع ساعة بنسى موضوع الأكل، هنا فرق بين الشبع وبين الجوع، وبين الجوع والرغبة والشهية، في فرق بين الإثنين، هذه كلها نقول عنها سلوكيات.

سماح: هون كمان بنحكي أنه مش الأكل لحاله بس يؤدي لزيادة الوزن، في سلوكيات خاطئة في تجويع الإنسان لنفسه، أنه يروح للأكل مرة وحدة باكل كثير، الحالة النفسية كمان بتأثر، بعض السلوكيات الخاطئة أنه الاكل السريع كمان بأدي لزيادة الوزن، مش أنه بس إحنا بناكل كثير معناته بزيد وزننا، في أشخاص باكلو كثير ولكن بيعرفوا يأكلوا صح، هون ممكن يؤدي فيهم هذا الأمر لزيادة الوزن، هون شو نصائحك دكتور لكل إلي بسمعونا، لحواء وآدم؛ للتخلص من زيادة الوزن، والتخلص من معدة السيلوليت إلي بتكون مزعجة خصوصاً للنساء؟

د. خالد: كلام سليم، صحيح، من ضمن الأشياء الخاطئة كمية الأكل ونوعيته، عملوا دراسة بأمريكا بالنسبة للسيدات البالغات من سن 18 لسن 40، حبوا يعرفوا قديش باكلو وكمية الاكل، فوجدوا أنه هم بياكلوا نفس الكمية، ولكن الاختلاف في النوعية، وجدوا أنه بياكلو 3 أرطال ما يعادل كيلو وثلث، هذا الكيلو والثلث قد يكون آلاف من السعرات الحرارية، وممكن نفس الكيلو والثلث يكون مئات من السعرات الحرارية، بمعنى معجنات ومقليات ومشويات، الأشياء هاي فيها كثافة عالية من السعرات الحرارية إلي فيها نسبة عالية من الدهون، لكن هو لو أكل خضار وفاكهة سنجد السعرات الحرارية قليلة مقارنة بالأطعمة الأخرى، وبنتكلم عن كمية بسيطة ومئات من السعرات الحرارية، فهو ليس بالكمية ولكن بالنوعية، فهذه تعتبر من الأشياء المهمة، كمان النشاط البدني بفيد في شغلات كثيرة، أول شيء هو بحرق شوي من السعرات الحرارية إلي بستهلكها، السبب الثاني إنه بحول الأنسجة الدهنية إلى أنسجة عضلية، بلاحظ إنه الأنسجة الدهنية بقول عليها أنسجة خاملة، والأنسجة العضلية بقولوا عليها أنسجة ناشطة، نفسها الأنسجة العضلية تستهلك جزءاً من الطاقة، بمعنى لو جبت شخصين وزنهم 120 كيلو، واحد معظم وزنة دهون إلي بقولوا عنها السمنة، والثاني معظم وزنة عضلات إلي بقولوا عنهم كمال الأجسام، ولكن لو أكلوا نفس الأكل رح نلاقي إلي عنده نسبة من الدهون بزيد في الوزن؛ لأنه جزء من تركيب جسمه أنسجة خاملة ما تستهلك طاقة إلي هي الدهون، ولكن الثاني جزء كبير من جسمه يحتوي على عضلات؛ فبالتالي بزيد الوزن لأنه بستهلك جزء من الطاقة، هذه تعتبر من فوائد الرياضة.

سماح: هون الرياضة، الأكل الصحي، نوع الأكل إلي إحنا بدنا نتناوله، والنشاط البدني والحركي، والأمور إلي بدنا ننتبه إلها وإحنا نأكل بطريقة أكلنا وبالمدة الي بدنا نتناول فيها الأكل، والتباعد أيضاً ما بين الوجبات، وما نجوع حالنا بشكل كثير كبير لحتى ما يصير عنا حالة من الهلع واحنا بنروح لوجبتنا الغذائية، بدي أتشكرك دكتور وشكراً لكل هاي المعلومات، الدكتور خالد المدني، استشاري تغذية علاجية ونائب رئيس الجمعية السعودية للغذاء والتغذية، كان معنا من السعودية، شكراً إلك.

شاهد أيضاً

قوّك يا بلد: الأجهزة الأمنية تفرج عن (6) صحفيين في الضفة الغريبة

مقدم البرنامج: محمد الأطرش. تاريخ البث: 15 أغسطس 2017.   الفقرة الأولى: الأجهزة الأمنية تفرج عن ...

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>